सप्तरीमा रक्सी खाएर होहल्ला गर्ने प्रहरी जवान कारबाहीमा

सप्तरी – सप्तरीको सदरमुकाम राजविराजमा रक्सी खाएर होहल्ला गर्ने प्रहरी जवान कारबाहीमा परेका छन् । रक्सी खाएर सुरक्षा जाँचमा खटिएका जिल्ला प्रहरी कार्यालय सप्तरीमा कार्यरत प्रहरी जवान सञ्जीवकुमार राय कारबाहीमा परेका हुन् ।

उनले शुक्रवार बेलुकी राजविराजमा रहेको महेन्द्र विन्देश्वरी बहुमुखी क्याम्पस अगाडि रक्सी खाएर गाडीको चेकजाँच गरेको भिडियो सामाजिक सञ्जालमा सार्वजनिक भएको थियो । यस क्रममा स्थानीयले प्रतिकार गरेपछि उनी अर्धनग्न बन्दै गालीगलौज समेत गरेका थिए । भिडियो अहिले अहिले सामाजिक सञ्जालमा भाइरल भइरहेको छ ।

भिडियो सामाजिक सञ्जालमा सार्वजनिक भएपछि जिल्ला प्रहरी कार्यालय सप्तरीले उनलाई कारबाही गरेको हो । सप्तरीका प्रहरी उपरीक्षक नरेन्द्रकुमार कार्कीले आचरण विपरीत काम गरेकाले उनलाई निलम्बन गरिएको जानकारी दिनुभयो ।